" سحباً سرت "
سحباً سرت برّاقها سبّاقي
يالله عسى همّالها ينساقي
يسقي وطن ريم الجنوب الشرقي
اللي سبق ميثاقها ميثاقي
الله يسامحها وأنا مسامحها
بس الله أعلم عن لضى أشواقي
تكوي خفوقي مثل كي الميسم
خوفي خفوقي ينصهر بأعماقي
قولوا لها ترجع لأني والله
ماني بقاوي بعدها الحراقي
قولوا لها أن كان فيها شيمه
ترجع تشوف اللي بحالي باقي
أدوِّن بدمعي حزين أبياتي
حبرٍ على صافي بياض أوراقي
وأبات طول الليل جفني ساهر
محروم نومه للشقى ذوّاقي
ذقت التعب في بعدها وأيامي
مثل الشهور وخاطري ماراقي
أحسب لياليها مثل مايحسب
اللي مقيّد عنقهم بوثاقي
متحسّف ومقهور ممّا تفعل
حالي صعيب وصار ماينطاقي
مستغربٍ من وين يات القسوه
في قلبها ياكيف تهوى فراقي
وآخر كلامي الله يسامحها
دامه سبق ميثاقها ميثاقي
ليست هناك تعليقات:
إرسال تعليق