" مسباح الجمر "
إلى أخي الشاعر على الراسبي الذي صدر له ديوان شعري مؤخرا بعنوان ( مسباح الجمر ) أرسلُ هذه الأبيات :
سلام " مسباح الجمر " القف الطير
من طار الى عين الصباح و" غبشها "
يسحب لك العزه حروف وتصاوير
ويروي حليلتها .... ويشبع عطشها
ما جيت اجر القاف من دون تفكير
مجنون من جرها بعد ما خدشها
هات الشعر وازهر ورود ونواوير
اما حياة الطيب ... بالطيب عشها
خل القصيد الذرب في دربك ينير
في محفل الاشعار قدم قرشها
لا جاتك الفكره .. قوافي طوابير
تصقل معانيها ... تعلي عرشها
جايب قصيده غير احساسها غير
إن ما تجي مثل الذهب ما ارشها
وإن ما تهز احساس كل المناعير
ابرك اخليها ...... واجهز نعشها
من بعدها تصبح وتمسي على خير
جيتك بقاف ن شوف دقة نقشها
2015/8
_______________
"العيد قرب "
العيد قرب والوجد نبضه يزيد
والشوق قرب من علالي قمته
من قلت ان القلب في وضع تصعيد
غنت احاسيسه وزادت همته
تضبخ من الفرحه بحبه بواريد
تزهر نواوير العشق من رسمته
فرحان قلبي ينطر مصافح العيد
بيطالع الكشخه وروعة بسمته
تعال صافحني م حاجة مواعيد!
القلب راضي ذا نصيبه و قسمته
باحساس طاهر كان من دون تعقيد
خلت عيونك في عيوني بصمته
يمينك المشفى ، يميني مياهيد
تشفي مياهيدي تغرب غمته
بيت المشاعر ... ما تحده تقاليد
البيت شامخ والوجد هو دمته
٢٧/ رمضان / ١٤٣٦ هـ
_____________
" دنياي ضحله "
دنياي ضحله بس تحتاج ... توضيح
ونعرف نفرق بين .. توفير ، جاري
والناس اللي تبقى " فالحلج " م تسيح
احسن تتطنشها ولا تجيب طاري
حاولت انسى قمت اصلي "التراويح "
م نسيت جرحك طول ليلي ونهاري
حسافه إني رغم كثر ... التسابيح
م نسيت اوجاعي ولا نسيت ثاري
الشوق سربالي وطيفك مثل ريح
تهب وتجيب الرمل في " عواري "
واويح نفسي ... آه .. واويح واويح
من درب احساسه مخالف مساري
يمال نهام العشق صاري ويطيح
ما بين " لنجات " العشق و "الهواري "
وم انته في حاجه اي توضيح ، تلميح
غير طريقك لا تجي في مداري
بحر الحزن إبداعه يحن ... ويصيح
يزجر ب عالي الصوت الامر طاري
غرقان إحساسي بدموع التماسيح
وزادت معاناته بقلب ن تجاري
ثم صار لي يومين من دربي ازيح
شوك الحسد رغم الغلا فيه جاري
والجسم اللي تستبيحه التجاريح
يعرض جروحه كان للجرح شاري
كم من محب يعيش دور المراجيح ؟!
قله بلاش يعيش دور ن حضاري
ببحر على قافي ولا يهزني ريح
وقول العواذل مابا اخليه صاري
والقافله ما تلتفت ...... للتنبيح
والصقر ما يهمه " صراخ " الحباري
5/7/2015
____________
"إلى من يهمه الشعر"
الراس منزل يرحب القاف ضيفه
ياتي بكيفه دون داعي وترتيب
قهويت ابيات الحبيب وليفه
وصبيت م دلالي علوم وتراحيب
ياللي رسموني بالمعاني اللطيفه
قل كيف الاقيهم على صفحة الويب
وانا الفقير ... اللي بجيبه رغيفه
يبكيه احساسي من بعيد وقريب
متلحفن حلمه .. ونومه رصيفه
واتريق الذكرى بلا شك أو ريب
الشعر يثمر ف القلوب الرهيفه
لانه رساله طيب من عاشق الطيب
ياهل العقول الواعيه والنظيفه
القلب متعب م البنا والتصاويب
ماصرت اميز بين قيضه.. خريفه
لكن اميز بين بالطيب والطيب
شاعر ويكتب جزل احساس كيفه ؟!
ولانته من ارحامه ولانته لهَ حبيب
سيرت احاسيسك . بنظره كفيفه
وكانت احاسيسك .. تجيبك بترتيب
(الشيفه شيفه والمعاني ضعيفه )
ومن شابه حضوره غيابه ترى يغيب
____________
" ذاكرة الجسد "
بكره يجيك الدور تحيا السالفه !
وكلمة حبيبي وين متفيدك ابد
ياللي م شاف الناس ربي شايفه
والله ما يجهل وﻻ يظلم احد
هذا انا وانته .. م نفس الطائفه
والموت واحد واللحد نفس اللحد
والعاطفه ...هيا اساس العاصفه
تعصف على الافكار وتزيد الوجد
مسكين يبكي من ظروف العاطفه
ما يعرف الاحساس غير اللي فقد
مثله "رغد" تذكر ابوها طايفه
وكثر البكى مارجعه والد "رغد"
وينه حصاد سنين .. وين طوايفه
خل الحروف سيوف تقطع دون حد
كانت غصون الحب جدا نايفه
واليوم صار الحب فارصفة البلد
تتبخر الاحلام ..... صارت هايفه
وما باقي الا بس " ذاكرة الجسد "
بكره يجيك الدور تحيا السالفه !
وكلمه " فديتك وين " متفيدك ابد
__________
مستفحله فيني المشااعر مالصباح
واشم من عطر الصبح إحساس غير
لم اسكتت فيني من الدهشه جراح
من عش صدري طار كم طيرن وطير
يا رونق الدنيا .... ويا رمز الكفاح
يالعولمه .... يا الحب الاول والاخير
يا ريحة الحنا ...... ويا وجه الفلاح
يا عطري الراقي ويا القلب الكبير
يإجمل إناث الارض ياارقى الملاح
يا أعذب قصيده منها كني اصير ؛
مستوطن إيوان المدائن والبطاااح
ومتسلطن بصوت الطبيعه والخرير
وباغني باحساسي مدام انه متاح
شفت الصبح من كلمتك جدا مثير
حتى جروحي روحت .. والهم راح
قلتي صباح الخير صار السوء خير
كل يوم صبحيني قبل شمس الصباح
يمكن مع الصدمه يرد العش طير
6/5/2015
_________
" مركز العشق "
لو العشق مركز..... وقلبك جمارك
ماني بدافع لاجلك اعشار واسداس
عادي حبيبي ﻻ ترد ف قرارك
( لي ف القدر بتطلعه يدين ملاس )
وخل المشاعر تعترف في مسااارك
الناس تعرف ليش تكذب على الناس
حبل الكذب دائم يصغر وقاااااااااارك
واول وقارك ما يحدد بمقيااااااااااس
واليوم هذا الحااااال والصدر داااارك
ارحب الى دااارك بلا قرع الاجراس
وبلا اذن يفتح ...... مداري مدارك
مسموح لك من صبع رجلي الى الراس
جيتك صباح الخير ... فاول نهااااااارك
واخر نهارك جيت مره بلا احسااااس
والله يا محلى الامل ..... وانتظارك
حبيت عطر الصبر حبيت الانفاااااس
حبيت كحلة هالعيون ..... وخمارك
مع عطر ثوبك عطر بارد ونسناس
طيف الحيا ...... دائم يصافح ستارك
وآنا اخمس لك من الشوق واحتاس
ما دام قلبي صار ينبض جوارك
هات الشعر هاك القلم هاك قرطاس
ارسم خفوقي مع خفوقك مشارك
( لي فالقدر بيطلعه اليوم ملاس )
وما دام حلمك ما يداوي " عوارك "
تركه ولا تسمح يغذيه وسواس
03/2015
_________
" كيد المحبين "
من كثر ما كيد المحبين زاجر
حسيت بان الكل يبحث عن خطاي
دنياي مهمومه بنصل الخناجر
تقطع من كتوفي ولا ترحم حشاي
كني بضاعه طحت ف يدين تاجر
ﻻ يعرف احساسي ولا يعرف مناي
بس همه يعرضني ف كبار المتاجر
تقسمني في نفسي وتبكيني دنياي
وجفت عيوني ... وشققتني المحاجر
ثم شق وجه الجود .. وتشل يمناي
جمعت وجهي وسط شنطه مهاجر
وعزمت ارحلك الى اخر اقصاي
من شفت احساس المغرضين فاجر
لبست محزم دنيتي وهمي قفاي
ماني من اللي يخلقون المشاجر
وماني من عيال الاجاويد منفاي
دنياي مهمومه بنصل الخناجر
تاكل من كتوفي ودمي لها ماي
26/4/2015
________
خليفه الصائغ
ليست هناك تعليقات:
إرسال تعليق