" يمطر عليه الشوق "
يمطر عليّه الشوق في كل ديره
واشرب من افلاج الحنين وغديره
ماعشت ضايق غير من غاب عني
يالعنبوها من حياةن مريره
استقبل القبلة علَشان اصلي
ألقى طيوفه ساجده فالحصيره
اعوذ بالله من طيوفه اذا جت
لا بارك الله في طيوفه الحقيره
تعبت اجابه ذكرياته واصارع
غُبن الفراق ولعنته مع نذيره
تتعبني الذكرى علَشان ماضي
واسترسل ابيات الغياب وهجيره
حاولت اتأقلم مع الوضع وانسى
لكن محاصيل الغياب الوفيره
تثمر على عيني وانا دوم اجني
شوق وحزن وارهاق وازداد حيره
تعال وارميني على ضفاف وصلك
بشرب من مياه الوصال الغزيره
تعال قفل باب ضيقي ونوحي
تعبت من صوت الغياب وصريره
تعبت مني في هدوئي واعاني
وين الفرج وينه طريقه ومسيره؟
22/5/2015
ليست هناك تعليقات:
إرسال تعليق