" هامة المجد "
لفى.. يسبق من اللهفه ازيز الطاير الميمون
قبل لا تغـرب عيـون النهـار وترمش العتمه
وعانقه الفضا في رجعته وتحاشدتـه مـزون
بكاه الغيم من كثـر الفـرح وتهادت النسمـه
وما انه نزل هلّت على ارضـه سحـاب عيـون
تفوق دمـوع هتّان السما.. ودموعنا حشمـه
نـزل بأرضٍ رفعهـا للسلام و مـا رضاهـا دون
تعانق هامة المجد العظيم اللي انكتب بإسمـه
نزل روحٍ علـى صدر الوطن كالعاشق المفتون
حيـى فيـه النهـار السرمدي و عادت البسمـه
طفى وجه الغروب بطلته فـي هيبـة الافنون
درى بـ قلوبنا في غيبته ترجـف مـع الضلمـه
نعم ما كانت رهاف المشاعـر تخفي المكنـون
طبع فينا الوله طول الغيـاب ووحّــد الرسمـه
كأنـه ما خُلِقنـا غيــر روحٍ واحــده فـ الكــون
لوَ انّ الواننـا تفـرق،، مشاعـرنا تجـي حِزمـه
فـ حب القايد، الأب المعظم .. ما لنا و اللون?!
نقدّم روحنـا لجـل السـلام إن حلّـت الازمــه..
واذا واحد بغـى فينـا و يحمل للبـلاد ضغــون
نروّض كل باغـي، ونكسـبـه بالـود و الحكمـه
نعـم قابــوس علّمنـا نصفـّي للجـوار ظنـــون
وعلمنــا علــى أن اختــلاف افكـارنــا نعمـه !
ومن مثله جمع كل القبايل في صفوفه عـون
يٱمـر بـس .. يلقانـا على دروب الوغـا زحمـه
ودرب عماننـا تريـــاق لا مـرّه وطن مطعــون
زرعه السلـم واثمـر بالرصيف قلـوب مبتسمـه
وقف بدروبها التاريـخ بيـده خنجــرٍ مسنـون
حفر بجبالهـا المجد، وعلى صدر السمـا نجمـه
تمد الفرقديـن بمجدهـا و موروثهــا المكنـون
وتهـدي كل من عاش الضـلال،، وإتّبع وهمـه
مـ دام اللي حكم فيهـا جعلها فالحفظ و الصون
من السبعين قابوس المكـاوم انصـف القسمـه
نحبّه،، والغيـاب اللـي طـرى فجّر بنا المخزون
كتبنا الشعـر من فيض الشعور.. ونوزن الكلمه
ولو ان الكـلام احيـان مـا يستوعـب المضمـون
يكفينــا فـ ميــدان المفـاخـر نفتخـر بإسمـه..
_________
"البداوة"
استوطن الشعر وانصب بالصحاري خيام
مهما تغرب و طال الوقت لأصلـه يعـود
واخضرت برجعته واورق غصون الحمام
من سالف الدهر قاطع للفيافـي عهـود
جيت اكتبه، والمشاعـر للقصايـد هيـام
واقف علـى مدخـل المعنـى بليّا قيـود
سلّمـت،، والهيـل بدلالـه يـرد السـلام
مضياف وارث طباعـه من طبـاع الجدود
غنّم لي الفكـر.. ضيّفني بعذب الكــلام
في وصف قومٍ عوايدهـم شهامه وجود
اللي لهم في سمـاوات المكـارم غمـام
وافعالهم في شداد الوقت تدوي رعـود !
من خيرت العُرْب نسل احرار شـمً كرام
مْوحديـن الإلـه.. وخاشعيــن السجــود !
ما فيه بـدوي أصيـلٍ مرتضـي بالحـرام
حاشـم ديـاره وجـاره وملتـزم بالحـدود !
صـفٍ.. تطايـر بنادقهـم بوقــت الزحـام
فزعاتهـم كـل هالعـالم عليهــا شهــود !
متوارثيـن البـداوه عـام مــن بعـد عـام
ما غيّر الوقت معنـاهـا.. ويبقى الصمود
مهمـا غـدا مـن تطــور زادهــم إلتـزام
يستوحش الرمل لو غابوا، وتحن القعـود!
تاريخهـم حمّـل الأمجـــاد بأعلـى سنـام
يسابــق الكـون وتخطّى جميــع النــدود !
من فوق هالمجـد يبقـى للتواضـع مقـام
البـال رايـق ولا همّـه إنخفــاض الوقـود!
وشيوخهـم والنعــم .. نضراتهـم للأمـام
جولاتهم ما تبي موكـب كبيـر و حشـــود
افعاالهــم احتـرااام وتفــرض الاحتـراام
واخلاقهم ثابته ف الارض ساس و عمــود
في الخيمه اللي انسجتها ايد بنت الحشام
وش عاد للشعـر لـو مـر بـ عيوون العنود?!!
هزيت فـنجـان افكــاري.. وقلـت الختـام
دام الشعر في وصوف البـدو مالـه حـدود !
_________
" اهجر ظنونك "
تركـت لك بــاب للظــن ،و مفاتيحــه
اغتابنـي مـا تشـا، يا اجمـل احبابـي
سلّمتـك القلـب و تفنّـن بـ تجـريحـه
لو ما رضيـت بكلامي وقسوة عتابـي
راضي غرامك.. وراضي منه تبريحـه
ظنّيت بـك خيـر حتـى لـو تعنـّى بـي
يجتاحك الشووق ،وادري صعبه تبيحه
ما دام يملي فراغ الوقـت فـ غيابـي !
وادري بكلامـك لـه ابعـاده و تلميحـه
ما تقصد الشّك..قصدك تلفت اعجـابي
يا مغرمي بالهوى.. لو للزعل ريحـه
لثّمت قلبـي قبـل لا تفـوح اعصابـي !
البعـد ما هـو ستــار و نقـدر نزيحـه
ان غبــت عنـّك امانـه قــدّر اسبابـي
ما فرّقتنــي عـن الاحبــاب تلويحـــه
يبقى خيالك معي، حارس علـى بابـي
اهجـر ظنونـك ، ترا الاوهــااام نزّيحـه
طول الغياب ألمحك في بسمة اصحابي
لو هي على الليل، عندي الليل تسريحه
اوقــف عليهــا أصـفّ النـوم بأهدابـي
مـا عـاد بـه وقـت للهّــم و تـرانيحـــه
ولا صرت مثـلك ازاعل و اشنـع ثيابـي
لو كان طبعي اعاتـب،، طحت بك طيحـه
لكن هالقلب ما يرضــى علـى احبابـي !
__________
" ضيعت صوتي "
ضّيعـت صوتي في متاهـات جوفي
مملي شعـور ولكـن الصمـت زاجر
كلما بغيـت اشعـل فتايـل حروفي
يرتادنـي من بيـن الاوصـاف فاجـر
يطفي كلامي وارتبـك في وقوفـي
ويسيـل حزنـي بين صــم المحاجر
تخونني فـ بعض المواقف وصوفـي
لا عـاش فينـي الـف تاجـر و تاجـر
في قمــة اوجاعي تجينـي طيوفـي
تعرض ملامـح شوهتهــا الخنـاجـر !
ومره الاقي فـ شارع الصمت خوفي
قاعـد يبيـع احبال صــوت و حناجـر
وانا الـذي محتاااج اشـرح ضروفـي
كم واحـد ضـج بسكوتـي وهااااجـر !
وكم فرصـة طيرتهـا مــن كفوفــي
ويا كـم هـم عـاش بالقلـــب ضاجـر
حتى القصايـد مالهـا غيـر شوفـي
محبوسةٍ بالقلب.. والقلـب ساجـر !
وين التي من قبل لا ابدي حسـوفـي
تحس مابي من هموووم ومشـااجــر
كبرت عنها فـ غربتـي و بـ حتوفـي
وما عدت انا اللـي استضيق و 'اناجر'!
ولا عادت أمـي تفهـم لـ فيلسـوفــي
حتـى ولـو تملـي دموعــي حواجـر
محتااجهـا ترمـي التعــب من كتوفـي
وتكبّــل يديـن الولـــه بالبنــاااجـــر
ملّيـت مـن صمتـي وطــوّل عـزوفـي
خايـف اعيــش العمــر كلـه مهااااجـر
_________
"للصبح جرح"
الحمدللـه، مهمـا ضـاق بـي صـدري!
ولّتف حولـي شتات وضيق وصعوبـه
يتشائم الجرح لا طولت في صبـري
يكسر بقلبـي ولانـي ملتفـت صوبــه
هونت كـل المصايـب ،والالـم يَـوري
نار بـ حشاي ، وتظل النار مشبـوبـه
وحملت بيدي طموحن ماعكف ظهري
من ثقل هالحمل ،كل الارض مرعوبه
استـآذن الليـل، لكـن مـا رضا يسري
يشتاقني الحزن لو ما سرت ف دروبه
لولا طموحي رضيت الموت من صغري
ولا ريـد هـذا الزمن يظهر لي عيوبـه
ما واجهتني الحيــاه، الا وهي تغـري
في كل شي، ولبعض الناس مرغوبه
بصبر على الضيق مادام القدر يدري
بالشاعــر ﺂﻟﻟيَ يصـارع كثرة ذنـوبـه
واطوي جراحي ولاني منتظر فجـري
للصبح جرحن، بدت تغمز لي هدوبـه!
___________
" طيّرت شوقي "
طيّـرت عكـس إتجـاه الريــح اشواقـي
وصـارت تشـقّ الطريق لقلبـك وعطفـه
من كثـر مـا ثـارت الأشـواق بأعماقـي
كسّـرت جنـح العواتــي، وانتهى عصفه!
اشتـاق لك .. ما مهـم اشرح لك الباقي!
لا صار وجهـي مـن الاشواق ما اعرفـه!
مدّيـت قِصــر اليديـن أتحسس أحداقـي
وتجرّحـت، من جفـاف المدمـع وطرفـه!
اشتاق...... كثر انتظاري موعد فْراقي !
واشتاق.... كثر احتياج الناااس للصدفه !
أحتــاج صُدفـه .. ترجـع هيبة عنــاقـي
وترميني لـ قربـك المزحــوم بـ الرأفـه
الى متــى يا البعيــد تطــول ارهـاقـي
ملتنـي الريـح والاشـــواق والشـــرفه
فـي شوفتــك ما تحـرّر قيـد عمـلاقــي
أحلـم، وحلمي تلاشــى داخـل الغـرفـه!
ليست هناك تعليقات:
إرسال تعليق